演變性人愛上女裝 姜皓文男兒身女人心

身形高大的「黑仔」姜皓文人如其名,皮膚黝黑,他在新片中卻穿上女裝,飾演一名跨性別人士,反差極大。今次鼓舞他作破格演繹的人,就是他一名已做變性手術的舊同學。角色塑造雖可借鏡舊友,但拍攝過程仍是有笑有淚,黑仔更試過穿着女裝透視睡衣落街試反應,他認真地表示:「有段時間鍾意咗女裝。」

採訪︰羅婉玲
攝影︰郭賢興

姜皓文近日在電影《翠絲》飾演一名「男兒身女人心」的跨性別人士,演技備受讚賞,他的出位造型亦令人有「嘩」一聲的感覺。黑仔日前接受《蘋果》專訪,他表示有向真正的跨性別人士取經之餘,反而沒有請教同是演員的太太殷寧(原名金慧英)。姜皓文說:「劇組有好多女性,我個個都有問,但冇問老婆,大家太熟啦!李敏(《翠絲》編劇)同我講女人係水做,有淚水、香水同湯水,女人最軟弱時都係一樣。」

除了參考身邊女性,黑仔亦有其他參考對象,就是他從前一名男同學,其性格跟戲中角色甚為相似:「細個時佢眼神好閃縮,唔敢望人,好抑壓,唔想俾人睇穿,好驚人哋知佢有女仔心,成人俾人蝦。」畢業後多年,姜皓文在路上遇到一位陌生女性上前跟他打招呼,他才驚覺原來對方就是昔日的舊同學:「當時我仲以為係飛來蜢,原來係佢,佢仲好開心咁話我知,佢做咗手術,𠵱家佢係女仔。正正係佢令我有呢個概念,佢畀到我好大嘅動力同信心。」

剃毛學媚態
塑造好角色的內心性格之後,要修正的,就是黑仔一貫的剛強外形。拍攝前,黑仔要減磅令外形較纖瘦,又要學肢體動作,令演出時自然流露媚態,更加要他剃去全身體毛,穿上女性內衣演戲時比較美觀。黑仔甚至曾經穿着女裝透視睡衣落街看街坊的反應,他認真地表示:「有段時間鍾意咗女裝,啲質料似絲質好滑。」

辛苦是辛苦,但拍攝時趣事亦有不少,黑仔回憶說:「有一場戲講我喺廁所發脾氣,我着住肉色內褲再着女裝底褲,但唔好睇,後來除咗肉色褲拍,攝影師話『唔得!唔得呀!走呀!』」原來是指他的下體走位穿崩,黑仔哈哈大笑:「收得好辛苦,又唔可以黐膠紙,呢場戲好好笑。」

勁索古龍水
戲中黑仔還要跟台灣男演員黃河咀嘴、拍床戲,但他笑言沒有想像中難受:「初初係有啲抗拒,有啲鬍鬚挨住唔知點咁,後來死啦!好似鍾意咗嗰陣古龍水味,大力索仲幾享受。拍嗰場戲,佢(指黃河)講笑話唔理啦,伸脷過嚟亂咁發,當然冇咁激烈,有小小口水花。」

不過說到最深刻的一場戲,姜皓文覺得反而是跟戲中老婆惠英紅攤牌:「紅姐幫我好大,場戲嘅情緒相當複雜,紅姐叫我掩住耳仔乜都唔好諗,自己feel到乜就演乜,好窩心。拍完呢場內心戲,我返到屋企喊咗成個鐘,感覺兩公婆係有抑壓,點都要講出嚟。」女人用水做,就算是大男人又何嘗不是?

化妝︰Herrylaiming Make-Up
髮型︰Jove Shek @La Mod Salon
場地提供︰香港九龍貝爾特酒店

Source

阿守對呢套戲都有 D 期望,希望黑仔會做得好好睇睇。而在呢篇新聞,阿守就對其中一段最有深刻印象:

除了參考身邊女性,黑仔亦有其他參考對象,就是他從前一名男同學,其性格跟戲中角色甚為相似:「細個時佢眼神好閃縮,唔敢望人,好抑壓,唔想俾人睇穿,好驚人哋知佢有女仔心,成人俾人蝦。」畢業後多年,姜皓文在路上遇到一位陌生女性上前跟他打招呼,他才驚覺原來對方就是昔日的舊同學:「當時我仲以為係飛來蜢,原來係佢,佢仲好開心咁話我知,佢做咗手術,𠵱家佢係女仔。正正係佢令我有呢個概念,佢畀到我好大嘅動力同信心。」

諗返起舊時細個返學,好驚畀人知道自己鐘意男人,個陣時唔係同學排斥自己,而係自己收埋自己,閃閃縮縮,反令自己變成班上的異類。好不容易捱到畢業及出來社會工作,算係見多識廣,再加上社會風氣又改變了,就算唔係主動 Come Out,對於其他人的閒言閒語都唔太 Care,有信心克服到。

「你又唔係同我做人世,而幸運地,我身邊同事老細比較著重我的工作能力,大於介意我的性傾向。」

好記得之前有個舊生會聚餐,閒談時講起有個師弟 Come Out 了,有一個平時講野癲癲的男同學大笑,點知被一個女同學幾句 KO:「依家咩年代丫?男人鍾意男人又點?So what?你唔係咁 Out 呀?」

時代真的不同了。

廣告

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s