裸男上環「激戰」 街坊樓下「觀戰」嘩嘩聲

上環上演「男男激蕩今晚夜」!早兩日喺蘇杭街好熱鬧，途人聚焦一個「大銀幕」，好肉緊伊嘩鬼叫，但日光日白又唔係播緊世界盃，究竟睇乜睇到入晒戲？喺有片有真相嘅年代，網上好快有人揭盅，分別有兩條短片瘋傳，其中一條片畫面先影個wide shot睇到圍觀者個個頭岳岳，望住對面樓一個着咗燈嘅單位；另一條片再zoom近啲，個單位冇落窗簾，大家見到一個健碩壯男嘅背影，同埋另一個人對長腿，懷疑埋身肉搏，喺街頭觀戰嘅花生友嘩聲四起。

兩條短片分別長34秒及44秒，可能片段有畫冇聲，觀戰人士充當旁述配晒音，其間露背男走開咗，露長腿嗰個就好似郁都唔郁，路人甲起哄：「起身！起身！起身！」企喺隔離嘅路人「殊」佢示意佢靜啲，各人屏息以待，路人丙細細聲話:「好過睇波喎真係！」冇幾耐，露背男又喺「大銀幕」出現番，原來係去拎毛巾，企喺街頭嘅口痕友又繼續做旁述：「再砌！」去到片段嘅尾聲，露長腿人士終於露出廬山真面目，「係男人confirmed」又一陣震耳嘅嘩聲響起，呢幕惹人無限聯想嘅片段圓滿落幕。

短片引起300幾個網民留言、畀人share咗超過500次，網民幫短片起埋命「男男激蕩今晚夜」，佢哋由道德層面、同性戀、到事件有冇人犯法多角度激辯，掀起一輪唇槍舌劍，有網民話：「其實有咩可能唔落窗簾呢？無論異性戀或同性戀，行房事都係私隱秘事，話晒香港都係華人社會，唔係人人都咁open㗎嘛，真係唔小心定有心做show呢？」花生食完，有人認真講：「呢D不雅視頻，好明顯已經犯法。告得入喎！」

上環嘅真人春宮片吸引街坊注足觀看，唔少人仲拎埋手機拍片，實行「有影錯、冇放過」，大律師陸偉雄表示，市民如果只係拍低魚水之歡嘅過程，未必觸犯法例，因為市民可以辯解影片用作證據或報警用途。不過，陸偉雄提醒如果市民發布影片，有機會觸犯《淫褻及不雅物品管制條例》。根據條文，若果影片被審定為「淫褻 」，不論發布者知唔知該物品屬淫褻，均屬犯罪，最高可罰款$100萬同監禁3年；若評定為「不雅」，亦不可以向18歲以下人士發布。

至於事件發生喺私人地方，兩位主角係咪完全免責？陸偉雄話由於事發單位喺公眾可見地方，但窗戶完全冇落窗簾仲開埋燈，因此有理由相信兩位主角預計到有人見到，呢個情況下有機會觸犯《刑事罪行條例》 第200章第148條「公眾地方的猥褻行為」，任何人無合法權限或辯解，在公眾地方或公眾可見的情況下，猥褻暴露其身體任何部分即屬犯罪，定罪可處罰款$1,000及監禁6個月。

Source

原片直擊：